На галоўную На галоўную
Напісаць ліст Напісаць ліст
Карта сайта Карта сайта
ru
by
en
ГЕРБ РБ Асіповіцкі раённы выканаўчы камітэт

Рака Свіслач  Асіповіцкая ГЭС  Мемарыяльны комплекс Брыцалавічы  Алея Герояў Мемарыяльны комплекс Расохі Асіповіцкі райвыканкам
Рака Свіслач

Як працуе сёння Асіповіцкі завод транспартнага машынабудавання

18 мая 2020

Экспартна-арыентаваным прадпрыемствам сёння няпроста. А яшчэ складаней, калі іх сфера дзейнасці звязана з транспартам. У перыяд пандэмічнай “самаізаляцыі” цэлых краін аб’ёмы перавозак звяліся да неабходнага мінімуму.

Для Асіповіцкага завода транспартнага машынабудавання напачатку года прасочваліся аптымістычныя перспектывы па ўсіх кірунках дзейнасці. Прадпрыемства працавала ў чатыры змены, выконваючы ўжо заключаныя кантракты, рыхтавалася да рашучага націску на канкурэнтаў у барацьбе за расійскі рынак і замацаванні пазіцый на бізнес-прасторах Еўрасаюза.

Амбіцыйныя планы пакуль давялося адкласці: попыт на вагоны і танк-кантэйнеры скараціўся на ўсім Еўразійскім кантыненце, так што прадпрыемствы галіны вымушаны рашаць аднолькавыя задачы па мінімізацыі непазбежных у існуючай сітуацыі страт.

Першая і, напэўна, галоўная: захаванне кваліфікаваных кадраў. Для сённяшніх спраў хапіла б 70% наяўнага штату, але эпідэмія рана ці позна скончыцца і перавагі ў перадзеле ажываючых рынкаў атрымае той, хто здолее хутчэй нарасціць аб’ёмы вытворчасці, захаваўшы належную якасць. Тут без зладжанага калектыву не абысціся.

Фінансы — яшчэ адна “лінія абароны”, адступаць з якой няма куды. Прычым адзін з “праціўнікаў” тут — рэзкае аслабленне беларускага рубля. Па выніках першага квартала АЗТМ атрымаў пралічаны бізнес-планам прыбытак у нацыянальнай валюце. Аднак разлічвацца з пастаўшчыкамі камплектуючых трэба было ў доларах, якія давялося набываць. Пры існуючай на момант плацяжоў курсавой розніцы замест прыбыткаў атрымаліся страты. Іх памер не крытычны, аднак такі “сюрпрыз”, канешне, не радуе.

Перад усімі прадпрыемствамі транспартнага машынабудавання ў Еўропе і Азіі паўсталі прыблізна аднолькавыя праблемы, таму ў іх вырашэнні прасочваюцца пэўныя заканамернасці. Гэта нармальна і да таго ж дае нагоду ўзгадаць філасофскі закон пераходу колькасці ў якасць. Калі працэс прыстасавання да экстрэмальных умоў дзейнасці будзе ісці досыць доўга, ён абавязкова зменіць унутрыгаліновыя ўзаемаадносіны ў посткарана-крызісны час. Аднак паколькі ніхто не рызыкне спрагназаваць кірунак і памеры такога ўплыву, застаецца толькі сачыць за падзеямі. І, канечне, “балець за нашых”.

АЗТМ засяродзіў намаганні на змяншэнні сабекошту прадукцыі і лакалізацыі выпуску камплектуючых на ўласным абсталяванні. Калі атрымаецца наладзіць вытворчасць апошніх з прымальнай эканамічнай выніковасцю, то ў перспектыве ад закупак даволі вялікай лінейкі дэталей можна будзе адмовіцца — калі не цалкам, то часткова.

Сёння ёсць сэнс развіваць кантакты з айчыннымі прадпрыемствамі, якія адносяцца да розных галін прамысловасці. Сярод партнёраў — АЗЖБК і “Бабруйск-аграмаш”, якія ахвотна карыстаюцца магчымасцямі АЗТМ па механічнай апрацоўцы, дакладнай рэзцы і згібанні металічных паўфабрыкатаў. У сваю чаргу АЗАА дапамагае калегам-машынабудаўнікам з закальваннем і тэрмаапрацоўкай.

Зацікаўлена ў паслугах АЗТМ альбо атрыманні ад прадпрыемства заказаў і мноства невялікіх прыватных фірм, так што патэнцыял партнёрства з бізнес-супольнасцю таксама нельга недаацэньваць.

А яшчэ завод транспартнага машынабудавання працуе над эксклюзіўным праектам: стварае з металу вялікі глобус. Гэта — унёсак калектыву прадпрыемства ў сёлетнюю кампанію па добраўпарадкаванні горада. Усталяваць артаб’ект плануецца на вуліцы Сумчанкі каля будынка аддзела па адукацыі.

Па матэрыялах раённай газеты "Асіповіцкі край"