Сёлета ў студатрадах Магілёўскай вобласці плануе папрацаваць каля трох тысяч чалавек, як падлічыў загадчык аддзела праграмнай і арганізацыйна-кадравай работы Магілёўскага абласнога камітэта ГА «БРСМ» Алег Бойка. І гэта толькі пачатак.
Зараз актыўна праходзіць дагаворная кампанія – ужо заключаны дагаворы на працаўладкаванне больш за 550 работнікаў. 133 чалавекі з 16 атрадаў Беларускай дзяржаўнай сельгасакадэміі вясной ужылі свае ўменні ў гаспадарках, займаліся рамонтам тэхнікі. У асноўным гэта хлопцы з мехфака і меліярацыйна-будаўнічага факультэта. Спатрэбіліся дадатковыя рукі і на палях – моладзь прывабілі да ўзворвання і сяўбы. Студатрад зоаінжынернага факультэта займаўся рамонтам і будаўніцтвам даільных залаў на фермах. У Бабруйскім раёне два атрады Бабруйскага аграрна-эканамічнага каледжа таксама ўжо завяршылі працоўную вахту.
Непасрэдна зараз занятыя справай чатыры атрады. Напрыклад, моладзь удзельнічае ў будаўніцтве аб’ектаў у Бабруйскім раёне. А вучні Вішоўскай сярэдняй школы ў Бялыніцкім раёне рыхтуюць да афарбоўкі жалезабетонныя агароджы каля малочна-таварных комплексаў. Навучэнцы Магілёўскага архітэктурна-будаўнічага каледжа займаюцца рамонтам лыжаролернай трасы ў Чавусах.
На цэнтралізаваным тэставанні ўдзельнікі студатрадаў дапамогуць з запісам і афармленнем сваім будучым калегам у Бабруйску, Горках і Магілёве. Улетку магілёўцы будуць занятыя не толькі на аб’ектах вобласці. Каля 90 чалавек паспрабуе сябе ў мінскім ЗАТ «Атлант». Не абыдзецца без іх і Усебеларуская студэнцкая будоўля ў Астраўцы. Студэнты Беларуска-Расійскага ўніверсітэта паедуць туды на будаўніцтва сацыяльных аб’ектаў.
У БРСМ нагадалі пра асаблівасці гэтага года. Запісацца ў студатрад стала яшчэ прасцей і бяспечней дзякуючы інфармацыйным ноу-хау. Рэспубліканская моладзевая акцыя «Выбіраем студатрад!» сёлета праходзіць з выкарыстаннем тэхналогіі QR-кода. Такім чынам, улічваючы эпідсітуацыю, маладыя людзі могуць запісацца не ва ўстановах вышэйшай адукацыі, а ў інтэрнэце – праз групы БРСМ у сацсетках з выкарыстаннем тэхналогіі QR-кода і хештэгаў #Выбіраем_студатрад!, #Студатрад, #Працуем_разам!, #БСА. Для гэтага дастаткова будзе запоўніць анлайн-анкету.
