Юбілейная канцэртная праграма «Свет музыкі - мастацтва чараўніцтва», прысвечаная 30-годдзю Узорнай студыі класічнай гітары «Рэнесанс» адбудзецца 12 мая ў 18.00 у актавай зале ГУДА «Цэнтр творчасці «Эверэст» Магілёва. Пра гэта паведамілі ва ўстанове дадатковай адукацыі.
«У 2003 годзе калектыву было прысвоена званне «ўзорны», - распавялі суразмоўцы. - У 2008 годзе Узорная студыя класічнай гітары «Рэнесанс» была ўзнагароджана Заахвочвальнай прэміяй спецыяльнага фонду Прэзідэнта Рэспублікі Беларусь. За гады яе існавання вырасла не адно пакаленне таленавітых навучэнцаў, сярод якіх пераможцы міжнародных фестываляў і конкурсаў».
Сёння ў студыі займаецца больш за 100 навучэнцаў. Апроч асноўнай прылады – класічнай шасціструннай гітары, студыйцы навучаюцца вакалу і гульні на электраінструментах. У 2019 годзе на базе Узорнай студыі класічнай гітары «Рэнесанс» адкрыты новы, запатрабаваны моладдзю, кірунак – рок-гурт.
