Адкрыты гарадскі конкурс "Арт-шанц" для цяжкіх падлеткаў сабраў у Магілёве ўдзельнікаў з усяго рэгіёна. Гала-канцэрт і ўрачыстае ўзнагароджванне пераможцаў прайшлі ў гарадскім Цэнтры культуры і вольнага часу, перадае карэспандэнт БЕЛТА.
У конкурсе прынялі ўдзел навучэнцы ўстаноў агульнай сярэдняй і сярэдняй спецыяльнай адукацыі ва ўзросце ад 10 да 18 гадоў, з якімі праводзіцца індывідуальная прафілактычная работа. Маладыя людзі паспрабавалі сілы ў некалькіх намінацыях: вакал, харэаграфія, мастацкае слова, музыка. Асобна ўдзельнікам прапанавалі стварыць відэакліп па некалькіх тэмах на выбар: "Калі мы адзіныя, мы непераможныя!", "Мая сям'я - маё багацце", "Наша культурная спадчына".
"У бягучым годзе на конкурс паступіла больш за 300 заявак - былі і сольныя, і калектыўныя нумары, - растлумачыла намеснік старшыні камісіі па справах непаўналетніх Магілёўскага аблвыканкама Наталля Ігнаценка. - Колькасць жадаючых прадэманстраваць свае таленты і паспрабаваць сілы ў творчым спаборніцтве ўзрасла больш як на 30 працэнтаў. Папярэднія этапы прайшлі ў анлайн-рэжыме - журы прымала і ацэньвала заяўкі, а гала-канцэрт сабраў фіналістаў конкурсу ўжо ўжывую. Гэта асаблівае мерапрыемства, таму што ў ім прымаюць удзел дзеці, якія спатыкнуліся і парушылі закон, а таксама дзеці, якія знаходзяцца ў цяжкай жыццёвай сітуацыі. Неабавязкова ўвесь творчы калектыў складаецца з такіх падлеткаў - яны ўваходзяць у склад выступоўцаў і праяўляюць сябе ў кожным з нумароў".
Удзельнікі "Арт-шанцу" займаюцца творчасцю менавіта на аматарскім, а не на прафесійным узроўні. Вядома, журы ацэньвае мастацкія здольнасці і таленты канкурсантаў, аднак не ў гэтым асноўная мэта. "Самае галоўнае, каб гэтыя дзеткі адчулі сябе яркімі зорачкамі тут і цяпер, таму што раней яны ніколі не падымаліся на сцэну, - адзначае Наталля Ігнаценка. - Немалаважна і прысутнасць бацькоў на канцэрце, якіх запрашаем абавязкова. Часта дарослым (тым больш з нядобранадзейных сем'яў) важна паглядзець на сваіх дзетак іншымі вачамі. Многія сапраўды здольныя, і трэба прыкласці максімум намаганняў, каб яны захацелі змяніцца да лепшага".
Конкурс "Арт-шанц" праходзіць ужо чацвёрты раз. У бягучым годзе ён быў прымеркаваны да 80-годдзя вызвалення Беларусі ад нямецка-фашысцкіх захопнікаў. Паколькі творчае спаборніцтва мае адкрыты фармат, удзел у ім прымаюць дзеці з усяго рэгіёна. Паводле слоў Наталлі Ігнаценка, конкурс - толькі адно з серыі мерапрыемстваў, якія праводзяцца з удзелам камісіі па справах непаўналетніх аблвыканкама. "Важна накіроўваць гэтых дзяцей і падтрымліваць у добрых пачынаннях, а таксама верыць у іх, каб падлеткам самім хацелася стаць на шлях выпраўлення. Гэты конкурс - інструмент, з дапамогай якога можна раскрыць дзіця: падлетка трэба бачыць, разумець і замест натацый даваць магчымасць праявіць сябе ў творчасці", - падкрэсліла яна.
Сярод удзельнікаў - навучэнцы Бабруйскага дзяржаўнага механіка-тэхналагічнага каледжа, будучыя хімікі. "Мы выступілі групай з сямі чалавек, на сцэне спявалі і танцавалі, - гаворыць Настасся Гарбар. - Вызначылі для сябе ваенную тэматыку і пасыл: важна памятаць Вялікую Перамогу і людзей, якія нам яе падарылі, а таксама шанаваць тое, што мы жывём пад мірным небам. Конкурс асаблівы, накіраваны на цяжкіх падлеткаў. Я лічу, што з дапамогай творчасці заўсёды можна перавыхаваць чалавека і дапамагчы яму вырашыць праблему, бо на сцэне выступоўца раскрывае свае эмоцыі, дзеліцца імі з навакольнымі, пераасэнсоўвае тое, што адбываецца. І мы ў калектыве падтрымліваем тых, каму гэта патрэбна, ні ў якім разе не асуджаем і не адхіляем іх".
Навучэнец Магілёўскага дзяржаўнага электратэхнічнага каледжа Мікіта Крукоўскі на сцэне разам з таварышамі выканаў песню пра салдата. "Раней вакалам не займаўся, для мяне гэта першы вопыт і, як аказалася, удалы, - усміхаецца хлопец. - Ды і тэма выступлення мне блізкая - прадзед ваяваў, як і іншыя, хто абараняў нашу краіну ў гады Вялікай Айчыннай вайны. Творчасць сапраўды мяняе чалавека ў лепшы бок, ён становіцца больш культурным і выхаваным. Плюс, калі ёсць любімы занятак або захапленне, менш жадання марнаваць час. Планую прадоўжыць займацца спевамі і ўдзельнічаць у такіх конкурсах".
