Мы выйшлі на новы ўзровень павышэння якасці агульнай сярэдняй адукацыі. Аб гэтым заявіў міністр адукацыі Андрэй Іванец перад пачаткам падагульняючага пасяджэння калегіі Міністэрства адукацыі, прысвечанага вынікам работы ведамства ў 2022 годзе і задачам на 2023-і, перадае карэспандэнт БЕЛТА.
"Нам удалося не проста захаваць, а выйсці на прынцыпова новы ўзровень павышэння якасці агульнай сярэдняй адукацыі. Істотна змянілася сістэма падагульняючай атэстацыі. Правядзенне рэпетыцыйнага цэнтралізаванага экзамену паказала, што мы зможам убачыць абсалютна кожнага выпускніка агульнай сярэдняй школы. Гэта дасць магчымасць нам атрымаць вельмі сур'ёзны інструментарый для работы абсалютна ў кожнай школе, у кожным класе. Кожны педагог, кожны настаўнік матываваны яшчэ больш на тое, каб выпусціць менавіта падрыхтаванага маладога чалавека", - сказаў Андрэй Іванец.
Міністр падкрэсліў, што адукацыйнае ведамства пастаралася стварыць максімальна зручныя ўмовы для ўсіх удзельнікаў працэсу - і навучэнцаў, і бацькоў, і педагогаў. "Менавіта таму 28 студзеня мы правялі фактычна генеральную рэпетыцыю цэнтралізаванага экзамену, калі ўсе навучэнцы 11-х класаў прынялі ў ёй удзел. Кожны з іх змог паспрабаваць сябе і зразумець, што такое па-за сценамі школы здаваць экзамен, якога ўзроўню складанасці будуць заданні, як змянілася структура заданняў. Нягледзячы на тое, што заданні называюцца тэстамі, па вялікім рахунку гэта звычайная кантрольная работа, якую яны выконваюць ва ўстановах агульнай сярэдняй адукацыі. Акрамя таго, мы зрабілі вельмі сур'ёзны крок па правядзенні кірмашоў заказчыкаў кадраў па мэтавай падрыхтоўцы. У снежні - студзені такія кірмашы прайшлі абсалютна ва ўсіх абласных цэнтрах, у іх прынялі ўдзел больш за 40 тыс. навучэнцаў і звыш 1,1 тыс. арганізацый заказчыкаў кадраў. Мы можам смела гаварыць, што сёння заказчыкі кадраў у сістэме адукацыі працуюць плячо ў плячо на выкананне агульных задач", - канстатаваў ён.
Андрэй Іванец адзначыў, што ў 2022 годзе сістэма адукацыі працавала над выкананнем важнейшых задач. "Першая - гэта, безумоўна, выхаваўчая функцыя на ўсіх узроўнях адукацыі. Другая - работа над павышэннем якасці адукацыі, пачынаючы ад устаноў дашкольнай адукацыі і да ўстаноў вышэйшай адукацыі. І трэцяя задача, вядома ж, падрыхтоўка кваліфікаваных кадраў для рэальнага сектара эканомікі. У сувязі з гэтым мы кіраваліся прынцыпам сацыяльнай справядлівасці, роўных правоў і даступнасці нашых маладых людзей незалежна ад таго, у якім населеным пункце яны пражываюць - у сельскім або ў Мінску. Пад увагай была і запатрабаванасць тых ці іншых спецыяльнасцей", - праінфармаваў міністр.
