Формула іх сельскага шчасця
У гэтыя выхадныя стануць вядомы імёны пераможцаў рэспубліканскага сямейнага сельскагаспадарчага праекта БРСМ «Уладар вёскі». За званне самай дружнай, гаспадарчай і крэатыўнай сям'і ў конкурсе, які пройдзе ў Шклоўскім раёне падчас купальскага фестывалю-свята «Александрыя збірае сяброў», будуць змагацца шэсць каманд.
Магілёўскую вобласць у фінале конкурсу прадставяць Яўген і Вольга Калініны з аграгарадка Арэхаўка Клічаўскага раёна. Выпрабаваўшы спаборніцкі азарт на рэгіянальным этапе, пара не мае намеру саступаць перамогу і ў Александрыі. Вольга прызнаецца:
- У нас у сям'і так павялося, што я - галоўны забаўнік, а муж - памочнік па ўвасабленні маіх ідэй. Жэня часам нават жартам пытаецца: «Чаму ва ўсіх жыццё роўнае і без прыгод, а ў мяне з табой як кардыяграма?»
Кіраўнік сям'і працуе прарабам у саўгасе «Добраахвотнік», Вольга – індывідуальны прадпрымальнік. З будучым мужам Олю звёў шчаслівы выпадак. Жэня зазірнуў у краму ў Бабруйску, дзе яна ў той момант працавала. Сімпатычная прадавец-кансультант спадабалася хлопцу. Прапанову зрабіў менш, чым праз два месяцы пасля знаёмства. Сказаўшы Женю «так», Вольга, гарадская жыхарка, прыняла рашэнне аб пераездзе ў вёску, на радзіму да мужа:
- Ведаеце, азіраючыся назад, ні аб чым не шкадую. У нас вялікая гаспадарка: пяцёра парасят, паўсотні курэй, качкі, кураняты, трус. У дадатак дзве самаедскія лайкі Ася і Арчы і котка Анфіса. Я вельмі лёгкая на ўздым і не баюся цяжкасцяў. У дзяцінстве на ўсё лета з'яжджала да бабулі ў вёску, таму сельскае жыццё мне знаёмае. Калі на конкурсе трэба было распрагаць каня, муж непакоіўся: ці спраўлюся? Дарма хваляваўся - уклалася ў 18 секунд.
Сакрэт сямейнага шчасця сям'і Калініных - усё рабіць разам і размаўляць адзін з адным. Ну і без гумару, канечне, нікуды.
