Вынікам IV інвестыцыйнага форуму «Магілёўскі раён – тэрыторыя магчымасцяў» стала падпісанне 29 дакументаў, у тым ліку шэрагу пагадненняў аб супрацоўніцтве па прывабліванні інвестыцый у эканоміку раёна на суму амаль Br50 млн і кантрактаў паміж прадпрыемствамі на суму $12,1 млн.
Усяго падчас форуму падпісана 29 дакументаў: 7 пагадненняў аб устанаўленні пабрацімскіх сувязяў з шэрагам рэгіёнаў Расійскай Федэрацыі, 11 пагадненняў па прывабліванні інвестыцый у эканоміку Магілёўскага раёна на суму амаль Br50 млн, 11 кантрактаў паміж прадпрыемствамі на суму $12,1 млн. Акрамя гэтага, падпісаныя пратаколы аб намерах па будаўніцтве на тэрыторыі раёна шэрагу аб’ектаў. Напрыклад, УКБ Магілёўскага раёна плануе рэалізаваць праект па будаўніцтве жылога квартала ў аграгарадку Палыкавічы, ААТ «Прамжылбуд» – квартала індывідуальнай жылой забудовы ў в. Гарадшчына, таксама плануецца абнавіць машынна-трактарны парк ААТ «Раманавічы», пабудаваць шэраг жывёлагадоўчых аб’ектаў на агракамбінаце «Усход».
«Магілёўскі раён мае найважнейшае значэнне ў развіцці ўсёй Магілёўскай вобласці, менавіта таму пільная ўвага, падтрымка і садзейнічанне ў рэалізацыі праектаў на тэрыторыі раёна – задача ўсёй вобласці, – падкрэсліў у сваім выступленні намеснік старшыні Магілёўскага аблвыканкама Руслан Страхар. – Важна, што сёння тут прысутнічаюць прадстаўнікі суседніх і далёкіх краін. Мы рады працягваць з імі супрацоўніцтва як на ўзроўні абласцей, так і раёнаў. Форум таксама сабраў прадстаўнікоў бізнесу Магілёўскага раёна. Менавіта вы фарміруеце рэгіянальны прадукт і ўкладваеце рэсурсы ў яго развіццё, і ад вас шмат у чым залежыць развіццё ўсёй тэрыторыі Магілёўскага раёна».
У завяршэнні выступлення Руслан Страхар агучыў важную для прадстаўнікоў бізнесу навіну: менавіта сёння Магілёўскі аблвыканкам прыняў рашэнне павялічыць у бягучым годзе падтрымку малога і сярэдняга бізнесу на тэрыторыі ўсяго рэгіёна. Рэалізацыя будзе ажыццяўляцца па двух напрамках: выдзяленне дадатковых бюджэтных рэсурсаў на кампенсацыю ўжо аформленых банкаўскіх крэдытаў, а таксама размяшчэнне дэпазітаў для таго, каб банкі-партнёры Магілёўскага аблвыканкама выдавалі крэдытныя рэсурсы на больш ільготных і прывабных умовах.
У ліку ўдзельнікаў форума – дырэктар Дэпартамента ўнутранай палітыкі Бранскай вобласці Расіі Віталь Свінцоў. Дзелавая сустрэча для прадстаўніка Саюзнай дзяржавы стала выніковай: падпісана пагадненне аб устанаўленні пабрацімскіх сувязяў. «Пагадненне аб супрацоўніцтве паміж Бранскай і Магілёўскай абласцямі заключана яшчэ ў 2010 годзе, зараз супрацоўніцтва пераходзіць на муніцыпальны ўзровень. Сёння заключаны дакумент аб супрацоўніцтве і пабрацімстве паміж Магілёўскім і Бранскім раёнамі, – сказаў ён. – Гэта выведзе зносіны і ўзаемадзеянне дзвюх тэрытарыяльных адзінак на якасна новы ўзровень. Яшчэ нядаўна наша маладзёжная дэлегацыя ўдзельнічала ў выдатным свяце «Купалле» («Александрыя сустракае сяброў»), а сёння ўжо прадстаўляем свой рэгіён на інвестфоруме, на якім мы шукаем шляхі сумеснага развіцця нашых тэрыторый».
Віталь Свінцоў падкрэсліў, што ў сучасных умовах дзвюм суседнім братэрскім краінам неабходна развівацца ў адным кірунку: «Мы заўсёды гаварылі, што толькі разам мы можам дабівацца пэўных вынікаў. У 90-х гадах мы закрыліся ў сваіх краінах, але жыццё паказала, што гэта не той шлях. Толькі разам і сумеснымі намаганнямі, праз абмеркаванні, ідэі, агульныя праекты мы будзем моцнай Саюзнай дзяржавай. Удзел у інвестфоруме даў нам унікальную магчымасць з’яднаць наша супрацоўніцтва на больш высокім і якасным узроўні».
