На прадпрыемствах Магілёўскай вобласці налічваецца больш за 1 тыс. спецыялістаў па ахове працы. Пра гэта расказаў журналістам начальнік абласнога ўпраўлення Дэпартамента дзяржінспекцыі працы Міністэрства працы і сацыяльнай абароны Сяргей Жыгуноў падчас рэспубліканскай навукова-практычнай канферэнцыі па пытаннях аховы працы ў Магілёве.
Сяргей Жыгуноў адзначыў, што ў рэгіёне выбудавана выразная сістэма аховы працы: «Праводзіцца цэлы комплекс мерапрыемстваў, накіраваных на мінімізацыю вытворчага траўматызму. У іх ліку тыдзень нулявога траўматызму, круглыя сталы і канферэнцыі, праца на кожным прадпрыемстве з адпаведнымі спецыялістамі. Перад намі стаіць задача навучыць і стымуляваць адказных за пытанні аховы працы, расказаць пра новаўвядзенні ў заканадаўстве, тлумачыць асноўныя моманты прафілактыкі вытворчага траўматызму. Сёння на прадпрыемствах вобласці налічваецца больш за 1 тыс. спецыялістаў па ахове працы. Не варта таксама забываць аб грамадскім кантролі і працы інспекцыі па ахове працы ў частцы праверачных мерапрыемстваў і той жа прафілактыкі».
Па словах Сяргея Жыгунова, у апошні час стала папулярная такая форма працы, як практычныя семінары, якія праводзяцца прама на працоўных месцах – мехдварах, лесасеках, дрэваапрацоўчых цэхах. Гэта выдатная магчымасць для профільных спецыялістаў на свае вочы ўбачыць усе нюансы, якія ў далейшым дапамогуць прадухіліць узнікненне няшчасных выпадкаў на вытворчасці. Праводзяцца таксама месячнікі бяспекі, якія цалкам ахопліваюць пытанні аховы працы ў асобнай галіне. Яны праходзяць з удзелам мабільных груп, створаных пры кожным гарадскім і раённым выканаўчым камітэце. Такія групы выязджаюць на прадпрыемствы і аказваюць там практычную і метадычную дапамогу.
«У рэгіёне сістэма аховы працы працуе: на сёння назіраецца зніжэнне па агульным траўматызме, скарачаецца колькасць выпадкаў па цяжкіх траўмах, – адзначыў Сяргей Жыгуноў. – Найбольш траўманебяспечнымі галінамі па-ранейшаму застаюцца сельская гаспадарка, асобныя арганізацыі прамысловасці, дрэваапрацоўкі, лясной гаспадаркі, транспарту. Радуе, што масавая ўборачная кампанія ў вобласці прайшла спакойна. Сёлета з пункту гледжання аховы працы аграрыі годна правялі ўсе сельскагаспадарчыя работы».
