Новыя дарогі, змена арганізацыі руху, устаноўка абсталявання для фіксацыі сярэдняй хуткасці - начальнік УДАІ УУС Магілёўскага аблвыканкама Віктар Ротчанкаў падчас выніковай прэс-канферэнцыі расказаў аб планах на 2023 год.
«У гэтым годзе ў нас запланаваны вялікія працы ў горадзе: будзе праводзіцца капітальны рамонт і рамонт шэрагу вуліц горада, працягнецца будаўніцтва дарогі-дублера. Пачнецца будаўніцтва новай вуліцы, якая злучыць вуліцы Касманаўтаў і Каралева. Па праекце тут будуць сфарміраваны перакрыжаванні з кальцавым рухам. Да канца года дарожныя службы павінны пачаць капітальны рамонт і мадэрнізацыю дарогі ў напрамку Чэрыкава. Ва ўсіх гэтых праектах Дзяржаўтаінспекцыя прымае актыўны ўдзел - мы распрацоўваем, узгадняем схемы руху, - расказаў ён. - Гэта карпатлівая праца, у якой важна ўлічыць усе пажаданні жыхароў Магілёва, зрабіць дарогі максімальна бяспечнымі і камфортнымі».
Акрамя гэтага, у горадзе працягнуцца працы па рэарганізацыі руху, у прыватнасці на буйных скрыжаваннях абласнога цэнтра. «На скрыжаванні праспект Пушкінскі - вуліца Гагарына пройдзе капітальны рамонт з наступнай схемай руху транспарту. Прывядуць у парадак участак ад вуліцы Гагарына да бульвара Непакораных. Акрамя гэтага, зменіцца схема руху па бульвары Непакораных, - распавёў Віктар Ротчанкаў. - Шэраг скрыжаванняў горада дапоўніцца асобна выдзеленай паласой для павароту налева. Будуць працягвацца і не бачныя жыхарам горада працы: рэгуляванне святлафораў з улікам загружанасці дарогі ў розны час сутак. Гэта трэба для таго, каб было камфортна перамяшчацца па горадзе як вадзіцелям, так і пешаходам».
Працягнуцца працы па ўсталяванні стацыянарнага абсталявання для фіксацыі сярэдняй хуткасці аўтатранспарту. «У мінулым годзе мы сфарміравалі і абсталявалі пяць участкаў кантролю сярэдняй хуткасці. Яны працуюць у населеных пунктах вобласці, праз якія ідуць рэспубліканскія дарогі. У гэтым годзе такія сістэмы абсталююць яшчэ ў двух месцах: населеным пункце Еўдакімавічы Шклоўскага раёна і па трасе М-15 паміж Мінскім і Шклоўскім напрамкам, - расказаў Віктар Ротчанкаў. - У рэгіёне прадоўжацца работы па ўстаноўцы стацыянарных датчыкаў кантролю хуткасці. Большая частка такога абсталявання размесціцца на аўтадарозе Менск-Гомель, там, дзе яна праходзіць праз Магілёўскую вобласць».
