Святы народнага календара стануць асновай выстаўкі-кірмашу "Кола жыцця" на свяце "Купалле" ("Александрыя збірае сяброў"). Аб гэтым карэспандэнту БЕЛТА расказалі ў Магілёўскім абласным цэнтры народнай творчасці і культурна-асветнай работы.
"Выстаўка будзе прадстаўлена ў форме дэкаратыўнага кола, што па традыцыі вянчала кірмашовы слуп на народных гуляннях, вакол якога размесцяцца кірмашовыя вулачкі. Пад сімвалам кола жыцця пройдзе і прэзентацыя свят беларускага народнага календара, у якіх адлюстраваны нацыянальны характар і рысы беларускага народа - гасціннасць, працавітасць, сфакусіраваны вялікі жыццёвы вопыт многіх пакаленняў", - расказалі спецыялісты.
Кожная вобласць і Мінск прадставяць інтэрактыўную прэзентацыйную экспазіцыю, тэматычныя творческыя праграмы, вырабы дэкаратыўна-прыкладнога мастацтва. Асноўная ідэя - адлюстраваць святы народнага календара беларускага народа. Напрыклад, Магілёўская вобласць будзе прадстаўляць летнія святы, асенні цыкл прэзентуе Гомельская і Віцебская вобласці, зімовы перыяд прадставяць Мінская вобласць і Мінск, а веснавыя святы - Брэсцкая і Гродзенская вобласці. Тут можна будзе пазнаёміцца са святамі "Гуканне вясны", "Багач", "Вялікдзень", "Юр'е", "Сёмуха", святам рамеснікаў "Казюкі", абрадамі "Цары", "Шчадрэц", "Купалле", "Пятроў дзень", "Зажынкі", "Жніво-сенакос", Мядовым, Яблычным, Арэхавым і Хлебным спасамі, "Зялёныя святкі (Тройца)", "Ільінскі кірмаш" і іншыя.
"Кожны рэгіён у сваёй экспазіцыі пастараецца перадаць мясцовы каларыт. Пазнаёмяць гасцей "Купалля" з асаблівасцямі народных свят у розных рэгіёнах, - адзначылі спецыялісты. - Тут жа можна будзе пазнаёміцца з майстрамі дэкаратыўна-прыкладнога мастацтва, асаблівасцямі народных майстроў рэгіёнаў".
Майстры народнай творчасці Брэсцкай вобласці прадставяць ткацтва, вышыўку, кераміку, бондарства, вырабы з раслінных матэрыялаў. Гомельская вобласць прадэманструе тканыя і вышываныя ручнікі з розных раёнаў рэгіёна, вырабы з саломкі і лёну, традыцыі бортніцтва, прадукцыю пчалярства і музей хлеба. Гродзенская дэлегацыя пазнаёміць з майстрамі народнай творчасці, вядомымі носьбітамі элементаў нематэрыяльнай культурнай спадчыны Гродзеншчыны. Акрамя таго, яны плануюць правесці майстар-класы па традыцыйных рамёствах: пляценне з прыродных матэрыялаў, размалёўка велікодных яек, ткацтва, выцінанка, традыцыйная выпечка.
У цэнтры выставачна-кірмашовай пляцоўкі будзе ўстаноўлена сцэна, дзе на працягу дня творчыя і народныя калектывы рэгіёнаў прадставяць насычаную, яркую і разнастайную канцэртную праграму.
"Кола жыцця" - навінка свята "Купалле" ў гэтым годзе. Арганізатары ўпэўнены, што такі фармат выстаўкі-кірмашу стане не толькі адной з самых яркіх пляцовак фестывалю ў Александрыі, але і пазнавальнай. "Госці фестывалю змогуць больш даведацца пра традыцыі розных рэгіёнаў, гісторыю нашай краіны і яе народныя абрады. Захаванне народных традыцый - сувязнае звяно паміж пакаленнямі, адметная рыса беларускай культуры, наша самабытнасць і непадобнасць на іншыя народы", - адзначылі ў абласным цэнтры.
Выстаўка-кірмаш "Кола жыцця" будзе працаваць на працягу ўсяго святочнага дня на александрыйскім полі. Свята "Купалле" ("Александрыя збірае сяброў") пройдзе ў Шклоўскім раёне 9-10 ліпеня.
