У Глускай цэнтральнай раённай бальніцы адкрылі комплекс палат для ветэранаў Вялікай Айчыннай вайны і працы. Ва ўрачыстай цырымоніі прынялі ўдзел намеснік старшыні Магілёўскага аблвыканкама Валерый Малашка і старшыня праўлення ГА «Беларускі фонд міру» Максім Місько.
Як адзначыў Максім Місько, Беларускі фонд міру дапамагае ўстановам аховы здароўя ва ўладкаванні такіх палат. «Нам удалося дапамагчы ўладкаваць больш за 1 тыс. такіх палат па ўсёй краіне. Наперадзе яшчэ шмат працы – прыкладна столькі ж трэба будзе зрабіць. Мы бачым, як шмат людзей далучаецца да гэтай акцыі і дапамагае. Таму што любая добрая справа без фінансавання немагчыма, – адзначыў ён. – Работнікі сферы аховы здароўя кожны дзень праяўляюць клопат аб сваіх пацыентах. А мы павінны вам дапамагчы, каб людзям у бальніцы было камфортна».
Усяго ў Магілёўскай вобласці на сённяшні дзень функцыянуе 85 палат для ветэранаў Вялікай Айчыннай вайны і працы. У Глускай ЦРБ сёння адкрылі дзве камфартабельныя і сучасныя палаты. І, як расказала галоўны ўрач раённай бальніцы Ірына Пятрова, новыя палаты больш падобныя на гасцінічныя нумары. «Абсталявалі дзве палаты: двухмесную ў тэрапеўтычным аддзяленні і аднамесную – у хірургічным. Ва ўладкаванні гэтых памяшканняў нам дапамог Беларускі фонд міру – на набыццё мэблі і бытавой тэхнікі было выдзелена каля Br10 тыс. Новыя палаты больш падобныя на гасцінічныя нумары: усё новае, ёсць халадзільнік, электрачайнік. Цяпер нашы пацыенты старэйшага пакалення будуць праходзіць лячэнне з камфортам і ўтульнасцю. А гэта, несумненна, таксама ўплывае на працэс выздараўлення».
Падарункі на гэтым не скончыліся. Магілёўскае абласное аддзяленне Беларускага фонду міру перадало бальніцы вымяральнікі артэрыяльнага ціску, тэрмометры і пульсаксіметры.
Старшыня Глускага райвыканкама Уладзімір Кніга адзначыў, што ў Беларусі клопат аб старэйшым пакаленні і развіццё сферы аховы здароўя з’яўляюцца аднымі з важных прыярытэтаў. «Апошнім часам Прэзідэнтам, урадам робіцца вельмі многа, каб сфера аховы здароўя атрымала патрэбнае абсталяванне, правяла неабходныя рамонты, добраўпарадкаванне. Не засталася ў баку наша Глуская цэнтральная раённая бальніца і паліклініка. За апошні час мы абнавілі кабінеты для нашых пацыентаў, атрымалі новае медыцынскае абсталяванне. Адкрыццё дзвюх палат павышанай камфортнасці для ветэранаў вайны і працы – працяг гэтай працы, – сказаў ён. – Тыя людзі, якія адстаялі ў жорсткай барацьбе нашу свабоду і незалежнасць, падымалі краіну з попелу і руін, заслугоўваюць такой пільнай і належнай да сябе ўвагі. Хачу выказаць словы падзякі тым людзям, без якіх гэтае свята не адбылося б: Беларускаму фонду міру, спонсарам. Мы бачым, што дзяржаўна-прыватнае партнёрства дае вынікі. Спадзяюся, у гэтых палатах пацыенты будуць хутчэй папраўляцца, атрымліваць увесь комплекс паслуг і ўсё гэта будзе спрыяць больш хуткаму акрыянню».
Завяршылася святочнае мерапрыемства ў Глускай раённай бальніцы ўручэннем узнагарод медыцынскаму персаналу і прадстаўнікам раённай улады.
