Адзіную адукацыйную платформу дыстанцыйнага навучання плануюць укараніць у Беларусі ў пачатку 2021/2022 навучальнага года, паведаміў сёння журналістам на жнівеньскім педсавеце работнікаў адукацыі Гомельскай вобласці міністр адукацыі Ігар Карпенка, перадае карэспандэнт БЕЛТА.
"Пандэмія падказала, трэба паскарацца ў пытаннях дыстанцыйнага навучання. І цяпер мы актыўна працуем над адзінай адукацыйнай платформай, якая павінна быць прэзентавана да канца гэтага каляндарнага года. Плануецца, што поўнамаштабна яна пачне працаваць з наступнага навучальнага года", - расказаў міністр.
На платформе будуць прадстаўлены напрацоўкі ў тым ліку з рэгіёнаў. "Мы прапанавалі абласцям расказаць пра лепшы вопыт настаўнікаў, які ёсць, запісаць відэаўрокі, унесці свае прапановы, што яны хацелі б бачыць на гэтай платформе", - адзначыў міністр. Напрыклад, некаторыя элементы для будучага рэсурсу ўбачылі і на выстаўцы, якая працавала сёння на жнівеньскім педсавеце ў Рэчыцы.
Цяпер інфармацыя, якая паступае, акумулюецца ў Нацыянальным інстытуце адукацыі. "У выніку мы павінны атрымаць платформу, якая будзе працаваць незалежна ад функцыянавання школы", - дадаў кіраўнік ведамства.
Ён звярнуў увагу, што дзеці хварэлі і да пандэміі, па розных прычынах прапускалі заняткі. "Сітуацыі былі розныя. Платформа дасць магчымасць дзіцяці паглядзець тыя ўрокі, якія праходзяць школьнікі ў пэўны момант, бо ў нас выбудавана адзіная метадычная сістэма, структура", - растлумачыў міністр.
На нарадзе Ігар Карпенка падзякаваў педагогам рэгіёна за тое, што яны ўключыліся ў распрацоўку новага рэсурсу. "І хоць я ўпэўнены ў тым, што ніякая дыстанцыйная платформа не заменіць класна-ўрочную сістэму, тыя прамыя, жывыя стасункі, якія неабходны ва ўстановах адукацыі, думаю, гэту работу з вашай дапамогай мы завершым да канца бягучага года, зможам яе прэзентаваць і затым пасля азнаямлення ўсе змогуць выказаць свае заўвагі", - сказаў ён.
Прадугледжваецца, што платформа стане дапаўненнем да адукацыйнага працэсу, а таксама своеасаблівай падмогай для маладых спецыялістаў.
Удзельнікамі жнівеньскага педсавета Гомельскай вобласці сталі больш за 700 чалавек. На нарадзе настаўнікам уручылі заслужаныя ўзнагароды, у тым ліку і за падрыхтоўку пераможцаў заключнага этапу рэспубліканскай алімпіяды па вучэбных прадметах. Прызамі "За асаблівы ўклад у развіццё адукацыі" ўзнагародзілі прадпрыемствы, якія аказваюць падтрымку ўстановам адукацыі вобласці. Добрыя словы прагучалі і ў адрас ветэранаў педагагічнай працы.
