Прадстаўнікі Нацыянальнага дзіцячага тэхнапарка і расійскага адукацыйнага цэнтра "Сірыус" сустрэнуцца ў студзені-лютым 2023 года ў Мінску для таго, каб абмеркаваць фарміраванне новых саюзных праграм, накіраваных на выяўленне і падтрымку таленавітай моладзі. Аб гэтым журналістам паведаміў старшыня камісіі Парламенцкага сходу па маладзёжнай палітыцы, спорце і турызме, намеснік старшыні Камітэта Дзяржаўнай думы Федэральнага сходу Расіі па справах СНД, еўразійскай інтэграцыі і сувязях з суайчыннікамі Арцём Тураў, перадае карэспандэнт БЕЛТА.
У Нацыянальным дзіцячым тэхнапарку сёння прайшло пасяджэнне камісіі Парламенцкага сходу па маладзёжнай палітыцы, спорце і турызме. Саюзныя парламентарыі абмеркавалі напрамкі дзейнасці па выяўленні, развіцці і далейшай падтрымцы адораных дзяцей і моладзі. "Мы сёння знаходзімся ў адным з цэнтраў росту для нашых дзяцей, для нашага падрастаючага пакалення. Менш за месяц таму мы знаходзіліся на федэральнай тэрыторыі "Сірыус", дзе дзейнічае адукацыйны цэнтр, які накіраваны на выяўленне, развіццё і падтрымку таленавітай моладзі. У Мінску дзейнічае аналагічны цэнтр - Нацыянальны дзіцячы тэхнапарк. Для нас вельмі важна сінхранізаваць праграмы гэтых цэнтраў. Мы рыхтуем візіт прадстаўнікоў "Сірыуса" ў Беларусь, для таго каб сумесна абмеркаваць у тым ліку і фарміраванне новых саюзных праграм, накіраваных на выяўленне і падтрымку таленавітай моладзі. Такія пляцоўкі, якія створаны ў Расіі і Беларусі, - гэта інвестыцыі ў будучыню, у нашу моладзь, навуку, адукацыю, спорт, творчасць", - сказаў Арцём Тураў.
Паводле яго слоў, камісіі важна ацаніць работу цэнтраў, зразумець, як зрабіць так, каб установы сінхранізаваліся і давалі той прадукт, які будзе садзейнічаць дадатковаму развіццю навукова-тэхнічнай прасторы Саюзнай дзяржавы. "Вядома, у першую чаргу гэта падтрымка таленавітай моладзі, для таго каб дзеці знайшлі сябе, выбралі прафесію і творча працавалі для нашых краін. Калі мы не будзем укладаць у нашу моладзь, у яе будзе ўкладаць нехта іншы. І мы бачым, наколькі заходнія краіны спрабуюць займацца хэдхантынгам, калі таленавітых людзей за гранты, за пэўныя магчымасці, у тым ліку ў навучанні, спрабуюць запрасіць у іншыя краіны. Нам трэба захаваць гэты патэнцыял унутры Расіі, унутры Беларусі, для таго каб нашы краіны развіваліся, навука развівалася і мы былі моцнымі. Гэта частка тэхналагічнага і інтэлектуальнага суверэнітэту", - рэзюмаваў старшыня камісіі.
У мерапрыемстве прынялі ўдзел дэпутаты Парламенцкага сходу Саюза Беларусі і Расіі, прадстаўнікі Міністэрства адукацыі Беларусі, Міністэрства навукі і вышэйшай адукацыі Расіі, а таксама Міністэрства асветы Расіі, дзеячы культуры і мастацтва. На пасяджэнні камісіі таксама былі пытанні аб арганізацыі стажыровак для педагогаў і студэнтаў Беларусі ў адукацыйным цэнтры "Сірыус"; аб арганізацыі ўдзелу маладзёжнага беларуска-расійскага сімфанічнага аркестра ў музычных фестывалях "Сірыуса".
