Старшыня Савета Рэспублікі Наталля Качанава ў час навагодняй дабрачыннай акцыі "Нашы дзеці" наведала сацыяльна-педагагічны цэнтр з прытулкам Ленінскага раёна Мінска і павіншавала яго выхаванцаў з надыходзячымі святамі, перадае карэспандэнт БЕЛТА.
Выхаванцы ўстановы падрыхтавалі для гасцей святочную праграму з песнямі, вершамі, карагодамі. Дзеці апрануліся ў касцюмы казачных персанажаў, а сам паказ не абышоўся без Дзеда Мароза і Снягурачкі.
"Акцыя "Нашы дзеці" сапраўды стала ў Беларусі добрай традыцыяй. Яна дазваляе не толькі прыйсці і павіншаваць вас са святамі, але і стаць добрымі сябрамі. Мы некалі пасябравалі з Аксанай Васільеўнай (дырэктар установы. - Заўвага БЕЛТА), і прыходзім не першы год, каб сустрэцца з вамі, пажадаць шчасця, дабрабыту, поспехаў, усяго самага добрага, - звярнулася Наталля Качанава да выхаванцаў сацыяльна-педагагічнага цэнтра. - Каб вы заўсёды помнілі і ведалі, што мы вас любім, вы нам патрэбны. Мы запрашалі вас у Савет Рэспублікі і вы прасілі перадаць віншаванні нашаму Прэзідэнту. І я яму іх перадала".
Спікер павіншавала хлопчыкаў і дзяўчынак з Новым годам і пажадала, каб ён выдаўся паспяховым для іх. "Няхай жаданні, якія вы загадалі пад Новы год (а мы ж усе іх загадваем) абавязкова збудуцца", - сказала Наталля Качанава.
Старшыня Савета Рэспублікі таксама падзякавала дырэктару і педагогам, якія працуюць у гэтай установе. "Вы аддаяце ім часцінку душы, дорыце цяпло і любоў. Вы робіце так, каб дзеці, якія тут знаходзяцца, сапраўды пасябравалі, адчувалі сябе камфортна і ведалі, што побач знаходзяцца надзейныя дарослыя людзі, якія гатовы дапамагчы", - падкрэсліла спікер.
Пасля святочнай праграмы Наталля Качанава ўручыла ўстанове сертыфікат на набыццё камп'ютарнай тэхнікі і далучылася да чаяпіцця з дзецьмі.
У гутарцы з журналістамі Наталля Качанава расказала, што сустрэча з выхаванцамі сацыяльна-педагагічнага цэнтра ў Савеце Рэспублікі была цудоўнай. "Дзеці з любоўю гаварылі аб нашай краіне, прасілі перадаць самыя добрыя словы і пажаданні нашаму Прэзідэнту. Сустрэча прайшла цудоўна, таму мы ўзялі для сябе за правіла: кожны раз сустракацца з дзецьмі ў гэтым педагагічным цэнтры, каб пачуць, якія ў іх мары, што ім цікава, чым яны хочуць займацца ў жыцці", - адзначыла спікер.
Наталля Качанава дадала, што ў кожнага дзіцяці, якое знаходзіцца тут, няпросты лёс. "Вельмі хацелася б, каб іх мары збываліся. Вядома, яны мараць пра сваю сям'ю, пра маму і тату. Вельмі важна, што ў нашай краіне даволі шмат людзей, якія хочуць не толькі працаваць у такіх цэнтрах, але і забіраць гэтых дзетак, выхоўваць іх, даваць цяпло сваёй душы. Мы вельмі ўдзячны суайчыннікам, якія дапамагаюць нашым дзеткам", - запэўніла старшыня Савета Рэспублікі.
Гаворачы пра выхаванцаў сацыяльна-педагагічнага цэнтра, Наталля Качанава выказала меркаванне, што гэтыя хлопчыкі і дзяўчаты па-асабліваму цэняць дабрыню: "Яны па-асабліваму цэняць тое, што маюць цяпер. Ім давялося сутыкнуцца з тым, з чым не хацелася б, каб нашы дзеці сутыкаліся. Цяжка, калі дзіця забіраюць з сям'і. Але гэта робіцца для таго, каб засцерагчы ад небяспекі і абараніць яго. Важна, што наша дзяржава робіць усё, каб гэтыя дзеці адчувалі сябе грамадзянамі нашай краіны і разумелі, што іх любяць, што яны патрэбны".
Дырэктар сацыяльна-педагагічнага цэнтра з прытулкам Ленінскага раёна Мінска Аксана Говен расказала, што ва ўстанове 18 выхаванцаў. Гэта дзеці ва ўзросце ад 4 да 15 гадоў з праблемных сем'яў. "У сям'ю прыйшла бяда. Каб дзіця не знаходзілася ў ёй, яго змяшчаюць у нашу ўстанову, дзе пануе атмасфера дзяцінства і радасці. Тым часам бацькі з нашай дапамогай, а таксама іншых суб'ектаў прафілактыкі пераадольваюць праблемы, якія ёсць асабіста ў іх або ў цэлым у сям'і", - сказала Аксана Говен.
Паводле слоў дырэктара ўстановы, дзеці чакалі навагодняга цуду і свята: "Яны рыхтавалі песні, вучылі вершы, вадзілі карагоды. А яшчэ дзеці рыхтавалі падарункі сваім блізкім і гасцям, якія да нас прыехалі. Хлопчыкі і дзяўчынкі пісалі пісьмы Дзеду Марозу. Яны хочуць цацкі, канцтавары, нейкае моднае адзенне, сучасныя гаджэты. І Дзед Мароз пачаў выконваць іх пажаданні".
У сацыяльна-педагагічнага цэнтра з прытулкам Ленінскага раёна Мінска і Савета Рэспублікі склаліся добрыя адносіны. "Сёння Наталля Іванаўна Качанава прыязджае да нас у госці трэці раз. Дзеці з нецярпеннем чакалі гэтай сустрэчы. Калі Наталля Іванаўна прыехала ўпершыню, дзеці былі рады гэтай сустрэчы і не хацелі адпускаць яе. Тады яна запрасіла хлопцаў і дзяўчат наведаць з экскурсіяй Савет Рэспублікі. Наталля Іванаўна стрымала слова, і мы з дзецьмі пабывалі ў Савеце Рэспублікі. Нас там чакалі чаяпіцце, экскурсія, наведванне музея. Гэта сустрэча на доўгі час пакінула незабыўнае ўражанне ў нашых выхаванцаў", - адзначыла Аксана Говен.
