Круглагадовую завочную алімпіяду для школьнікаў плануюць увесці ў Беларусі з наступнага года, паведаміў міністр адукацыі Андрэй Іванец на падагульняючай калегіі камітэта па адукацыі Мінгарвыканкама, перадае карэспандэнт БЕЛТА.
"Сёння Міністэрства адукацыі перафармаціруе сістэму падрыхтоўкі да алімпіяд. Мы зробім яе круглагадовай", - сказаў Андрэй Іванец.
Ён звярнуў увагу, што работа па падрыхтоўцы алімпіяднікаў мае своеасаблівы шаблонны характар: праводзіцца спачатку раённы этап, затым - гарадскі і потым пачынаецца падрыхтоўка да рэспубліканскага этапу. Аднак, паводле слоў міністра, выяўленне адораных і таленавітых юнакоў і дзяўчат неабходна праводзіць круглы год па ўсёй краіне, незалежна ад месца іх пражывання.
"Плануем з наступнага навучальнага года ўвесці круглагадовую завочную алімпіяду. Яна будзе своеасаблівым навучальным цэнтрам для кожнага маладога чалавека. Плануем наладзіць круглагадовыя ў час канікулярнага перыяду зборы для падрыхтоўкі ўсіх хлопчыкаў і дзяўчынак з усёй рэспублікі і па ўсіх вучэбных прадметах. Гэта дазволіць у аднолькавай ступені раскрыць той патэнцыял, які сёння ёсць у нашых школьнікаў з кожнага кутка краіны, для атрымання больш высокіх вынікаў", - адзначыў міністр.
Паводле яго слоў, значная работа ў гэтым напрамку будзе адведзена не толькі школам, абласным інстытутам развіцця адукацыі, але і ўніверсітэтам. За кожным напрамкам, вучэбным прадметам неабходна замацаваць той ці іншы ўніверсітэт, факультэт, тых ці іншых выкладчыкаў, якія будуць працаваць з хлопцамі і дзяўчатамі, прычым не толькі на этапе іх паездкі на міжнародныя алімпіяды.
