Прэзідэнт Беларусі Аляксандр Лукашэнка 28 чэрвеня падпісаў указ нумар 196, якім зацверджана Канцэпцыя прававой палітыкі. Аб гэтым БЕЛТА паведамілі ў прэс-службе беларускага лідара.
Канцэпцыя ўяўляе сабой структураваны ў пяці главах дакумент, што вызначае стратэгію развіцця ўсёй прававой сістэмы краіны, якая ў сучасных умовах павінна не проста рэгуляваць грамадскія адносіны, але і папярэджваць магчымыя выклікі і пагрозы.
У рамках канцэпцыі вызначаюцца паняцце прававой палітыкі Беларусі, яе мэты, прынцыпы, а таксама суб'екты: "Прававая палітыка - навукова абгрунтаваная дзейнасць дзяржавы пры ўдзеле грамадзян, грамадскіх інстытутаў па фарміраванні і развіцці ўсіх элементаў прававой сістэмы".
У дакуменце замацоўваюцца нацыянальныя гісторыка-культурныя асновы прававой сістэмы, прасочваецца эвалюцыйны шлях яе станаўлення: "На працягу ўсёй сваёй гісторыі краіне неаднаразова даводзілася адстойваць незалежнасць, забяспечваць бяспеку па перыметры граніц, аказваць дапамогу як цэлым дзяржавам, так і асобным групам насельніцтва. Гэтыя працэсы паўплывалі на менталітэт беларусаў, характар якіх заўсёды вызначалі талерантнасць, стваральнасць, непрыманне агрэсіі і націску звонку. Важна захаваць і прымножыць гэтыя лепшыя якасці беларускага народа".
"Сёння Рэспубліка Беларусь - дзяржава, пабудаваная на трывалым фундаменце агульначалавечых каштоўнасцей, якая імкнецца да мірнага суіснавання, канструктыўнага дыялогу і ўзаемавыгаднага супрацоўніцтва з іншымі дзяржавамі і рэгіёнамі, што знаходзіць адлюстраванне ў нацыянальным праве", - гаворыцца ў канцэпцыі.
Замацоўваюцца ідэалагічныя імператывы, якія выступаюць фундаментам прававой палітыкі. Дзяржаўны суверэнітэт і тэрытарыяльная цэласнасць з'яўляюцца ключавымі. На іх аснове рэалізуюцца астатнія - нацыянальная бяспека, народаўладдзе, сацыяльная справядлівасць і іншыя. Будзе абаронены канстытуцыйны лад - будуць абаронены інтарэсы грамадзян.
Таксама ў канцэпцыі прадугледжваюцца прыярытэтныя напрамкі развіцця галін заканадаўства. У сферах заканадаўства аб абароне і нацыянальнай бяспецы трэба ўзмацніць абарону інфармацыйнага суверэнітэту краіны, распрацоўваць наднацыянальныя стандарты і правілы ў галіне інфармацыйнай бяспекі з акцэнтам на пашырэнне нацыянальных прававых інтарэсаў. У сферах грамадзянскага, эканамічнага (гаспадарчага) заканадаўства трэба рэалізоўваць прынцып сацыяльнай адказнасці бізнесу перад дзяржавай, грамадствам і грамадзянамі. У рамках заканадаўства, якое рэгулюе сацыяльную сферу, неабходна зрушыць акцэнты прававога рэгулявання ад апекавання дзяржавы да ўстанаўлення партнёрскіх адносін паміж дзяржавай, грамадствам і грамадзянамі. Трэба выбудоўваць узаемавыгаднае супрацоўніцтва, павышаць адказнасць кожнага грамадзяніна за сваё жыццё, здароўе і дабрабыт.
У Канцэпцыі прававой палітыкі захоўваецца трэнд на ўніфікацыю і кадыфікацыю. Прадугледжана кадыфікацыя заканадаўства ў сферы аховы навакольнага асяроддзя, інвестыцыйнага заканадаўства, а таксама сістэматызацыя заканадаўства ў сферы інтэлектуальнай уласнасці і інш.
У адпаведнасці з канцэпцыяй прававая работа будзе будавацца па формуле "моцны Прэзідэнт, уплывовы парламент, ініцыятыўны ўрад пры сувязнай ролі Усебеларускага народнага сходу".
Прымяненне канцэпцыі дасць магчымасць актуалізаваць і накіроўваць усе прававыя працэсы - ад развіцця заканадаўства да навукі і адукацыі.
