Магілёўскі заасад да зімы адрамантаваў вальеры і нарыхтаваў больш за 200 т збожжа
Магілёўскі заасад актыўна рыхтуецца да халадоў: рамантуюцца вальеры і хованкі, нарыхтоўваюцца кармы і сена, ветэрынары штодня аглядаюць жывёл. Пра гэта паведаміў дырэктар магілёўскага агралесатэхнічнага каледжа імя К. П. Арлоўскага Міхаіл Сасонка.
Па словах дырэктара, для ўтрымання жывёл зімой у заасадзе ўсё падрыхтавана. «Павялічылася пагалоўе траваедных, дадалося драпежнікаў. З’явіліся леў, пума, рысі. Для камфортнай зімоўкі ўсіх жывёл адрамантавалі навесы і хованкі, прывялі ў парадак кармушкі і вальеры там, дзе гэта было неабходна. Правялі патрэбны рамонт стойлаў, дзе ў нас ўтрымліваецца восем старэйшых коней. Для цеплалюбівых асобін таксама створаны ўсе ўмовы. Так, напрыклад, у доміку льва ўльтрафіялетавы абагравальнік. Ён будзе падтрымліваць камфортную тэмпературу – каля 12 градусаў», – расказаў дырэктар каледжа.
Корм для жывёл таксама нарыхтаваны ў патрэбным аб’ёме і адпраўлены на захоўванне ў спецыяльныя памяшканні. «Кармоў дастаткова. Сена нарыхтавана каля 205 т, збожжа – каля 216 т, адпраўлена на захоўванне і сена. Усё гэта дазволіць забяспечыць траваедным спакойную і сытую зіму. Драпежнікі таксама забяспечаны ўсім неабходным. Пры нарыхтоўцы кармоў на зіму актыўна дапамагалі навучэнцы каледжа – рабілі венікі для кармлення, – расказаў Міхаіл Сасонка. – Увосень мы павялічваем аб’ёмы ежы для жывёл. Гэта дапамагае ім нарасціць неабходную тлушчавую праслойку. Наш новы падапечны, леў, з’ядае каля 10 кг мяса за суткі. Ён нядаўна пераехаў да нас, таму цяпер на адкормцы. Калі гэты перыяд скончыцца, за суткі драпежнік будзе есці каля 7 кг мяса».
Узімку аб’ём ежы для жывёл будзе карэктавацца ў залежнасці ад тэмпературы на вуліцы: калі мароз больш за 15 градусаў, аб’ём кармлення павялічваецца на 20%. Пры неабходнасці рацыён падапечных карэктуецца. «У заасадзе жыве тыгр Арцём, які ў наступным годзе адсвяткуе 25-годдзе. Узрост шаноўны, у жывёлы з’явіліся праблемы са здароўем: выпала частка зубоў, баляць лапы. Мяса кавалкамі ён ёсць не можа, рыхтуем яму спецыяльны фарш. Для падтрымання здароўя ён атрымлівае малако, мёд, яйкі. У нас жыве вялікі статак зуброў. У дзень толькі адзін зубр з’ядае 3 кг канцэнтрату (зерне з мукой), удосталь сена і сакавітых кармоў – гэта морква, капуста, буракі. Сярэдняя вага адной жывёлы – каля 400 кг, самцы могуць важыць да 1 т, – падкрэсліў загадчык вучэбнай лабараторыі «Заасад» каледжа Іван Ніжнікаў. – Усіх жывёл рэгулярна аглядаюць ветэрынары. Для нас важна, каб яны былі здаровыя і добра сябе адчувалі».
Рыхтуюць да зімы не толькі жывёл і іх вальеры: да навагодніх святаў упрыгожаць тэрыторыю заасада. Зараз распрацоўваюцца варыянты. Ужо рыхтуюць сцэнарый, шыюць касцюмы і для традыцыйных ранішнікаў у заасадзе. «У сезон нас наведвае амаль мільён чалавек. Мы стараемся зрабіць іх адпачынак цікавым і пазнавальным. У гэтым годзе вырашылі падоўжыць працу паравозіка, каб наведвальнікі маглі зблізку разгледзець зуброў. Прыдумляем і новыя формы працы. Зараз прапрацоўваем варыянт начных экскурсій па заасадзе падчас навагодніх і калядных святаў. Большая частка жывёл вядзе начны лад жыцця. Таму пры выкарыстанні цёплага святла і ў суправаджэнні экскурсавода можна будзе ўбачыць зусім іншае жыццё нашых падапечных», – падзяліўся планамі дырэктар каледжа Міхаіл Сасонка.
У Магілёўскім заасадзе жыве больш за 380 гадаванцаў, у тым ліку алені, лані, муфлоны, які, ваўкі, тыгр, мядзведзь, трусы, куніца, паўліны, цацаркі і зубры. Тэрыторыя – каля 170 га.
Заасад у Магілёве існуе ўжо каля 15 гадоў. Гэта не толькі месца карыснага адпачынку гараджан і гасцей Магілёва – тут праходзяць вытворчую практыку навучэнцы агралесатэхнічнага каледжа імя К. П. Арлоўскага.
Магілёўскі абласны выканаўчы камітэт