Вежы, ёлкі і драконы: у Магілёўскім заасадзе стартаваў конкурс снежных скульптур
Вежы, ёлкі, дзіўныя жывёлы і драконы: у Магілёўскім заасадзе стартаваў традыцыйны адкрыты конкурс архітэктурных снежных збудаванняў вялікіх і малых форм "Снежная фантазія". Пра гэта расказала намеснік дырэктара па вучэбна-выхаваўчай рабоце Магілёўскага дзяржаўнага ордэна Працоўнага Чырвонага Сцяга агралесатэхнічнага каледжа імя К.П. Арлоўскага Вікторыя Пуцькова .
«Надвор'е нам падарыла сёлета снежную зіму, а таму наш конкурс не страчвае сваёй актуальнасці, - адзначыла яна. - Конкурс будзе праходзіць на тэрыторыі навучальнай лабараторыі "Заасад". Снежныя скульптуры, якія з'явіліся па выніках творчага спаборніцтва, стануць сапраўднай разыначкай заасада».
Удзельнікамі конкурсу могуць стаць каманды навучэнцаў устаноў адукацыі - максімум 7 чалавек. Яны павінны будуць да 20 снежня ўвасобіць у жыццё сваю задумку. «З году ў год арыгінальнасць снежных скульптур толькі расце. Ужо сёлета ў нас з'явяцца вежы, незвычайныя жывёлы, разнастайныя навагоднія ёлкі, а яшчэ сімвалы гэтага года - драконы. Вышыня снежных збудаванняў будзе вар'іравацца ад 2 да 6 м», - падзялілася намеснік дырэктара.
Вызначаць пераможцаў будуць па некалькіх намінацыях: самая арыгінальная работа, прыгажосць выканання і майстэрства, самая працаёмкая работа і выбар наведвальнікаў заасада. Журы будуць ацэньваць мастацкі ўзровень, складанасць, чысціню і майстэрства выканання, выразнасць.
Падвядзенне вынікаў зімовага творчага спаборніцтва плануецца правесці 21 снежня. Пераможцы ў намінацыях атрымаюць дыпломы і падарункі, дыпломамі будуць узнагароджаны ўсе ўдзельнікі конкурсу.
Навучальная лабараторыя "Заасад" Магілёўскага агралесатэхнічнага каледжа - адна з разыначак Магілёва. Толькі сёлета яе наведалі больш за 300 тыс. чалавек.