Рунец: ужо можна гаварыць аб падпісанні кантрактаў на $1,5 млрд па выніках X Форуму рэгіёнаў Беларусі і Расіі
Вынікам X Форуму рэгіёнаў можа стаць падпісанне кантрактаў на $1,5 млрд, заявіла журналістам старшыня Пастаяннай камісіі Савета Рэспублікі па эканоміцы, бюджэце і фінансах Таццяна Рунец па выніках сумеснага пасяджэння арганізацыйных камітэтаў па падрыхтоўцы X Форуму рэгіёнаў Беларусі і Расіі, паведамляе карэспандэнт БЕЛТА.
"Форум рэгіёнаў - важная падзея як для беларускага боку, так і для расійскага. А дзясяты форум - юбілейны, ён насычаны вялікай праграмай. Па-першае, 9 секцый, пленарнае пасяджэнне, сустрэча губернатараў са старшынямі Савета Федэрацыі і Савета Рэспублікі - гэта таксама вельмі знакавая падзея", - расказала Таццяна Рунец.
Паводле яе слоў, адной з ключавых стане секцыя, прысвечаная адзінай прамысловай палітыцы. "Прэзідэнт пастаянна паўтарае, што эканоміка - гэта аснова нашага развіцця і ўзаемадзеяння. У рамках работы нашай секцыі мы хочам вызначыць зыходныя пункты ў прамысловай палітыцы. Пагадненне падпісана, але ёсць праблемныя моманты, якія трэба ўрэгуляваць. У мінулым годзе на форуме мы таксама абмяркоўвалі гэту тэму, але яна не праходзіла чырвонай ніткай нашага абмеркавання. Але ўжо тады мы задалі тон, што адзіная прамысловая палітыка павінна быць. Таксама мы абмяркоўвалі прызнанне тэхналагічных аперацый беларускіх прадпрыемстваў у Расійскай Федэрацыі, прызнанне электроннага подпісу. Думаю, што ў рамках форуму мы выпрацуем пэўныя напрамкі, якія дапамогуць міністэрствам Беларусі і Расіі паставіць рэперную кропку ў рамках рэалізацыі гэтых асноўных падыходаў, якія перашкаджаюць цяпер нашым прадпрыемствам у асобных выпадках выходзіць на расійскі рынак", - адзначыла сенатар.
"Адным з асноўных вынікаў Форуму рэгіёнаў з'яўляецца падпісанне пагадненняў і кантрактаў. У гэтым годзе ў нас плануецца на кожнай секцыі падпісанне пагадненняў, таксама на пленарным пасяджэнні і на сустрэчы губернатараў са старшынямі Савета Федэрацыі і Савета Рэспублікі. Акрамя таго, будуць падпісаны камерцыйныя кантракты. Я не магу цяпер агучыць поўную лічбу, таму што работа яшчэ вядзецца, але, думаю, што больш, чым у мінулым годзе. У мінулым годзе мы падпісалі кантракты на суму каля $1 млрд. Думаю, што ў гэтым годзе лічба будзе значна вышэйшай. Цяпер ужо можна гаварыць пра эквівалент $1,5 млрд", - дапоўніла Таццяна Рунец.