У Беларусі па праграме ЮНІСЕФ арганізаваны юрыдычныя кансультацыі для бацькоў
Адвакаты Мінскай абласной калегіі адвакатаў вядуць бясплатнае анлайн-кансультаванне дзяцей і бацькоў па праграме Дзіцячага фонду ААН (ЮНІСЕФ) у Беларусі, паведаміла БЕЛТА старшы каардынатар па інфармацыйнай дзейнасці нацыянальнага офіса арганізацыі Хрысціна Дулевіч.
У рабочыя дні з 17.00 да 19.00 можна задаць любое пытанне, якое датычыцца правоў і інтарэсаў дзіцяці, па грамадзянскім, сямейным, жыллёвым, адміністрацыйным і крымінальным праве. Кансультацыі праводзяцца ў рамках праграм Дзіцячага фонду ААН (ЮНІСЕФ) у Беларусі ў партнёрстве з Беларускай рэспубліканскай калегіяй адвакатаў пры фінансавай падтрымцы ўрада Вялікабрытаніі.
Каб атрымаць кансультацыю, неабходна знайсці ў Telegram чат-бот kids_lawyer_bot - "Дзіцячы Адвакат", націснуць "Старт", выбраць тэму кансультацыі, напісаць сваё пытанне і дачакацца адказу.
Кансультацыі бясплатныя. Інфармацыя, якая абмяркоўваецца з адвакатамі, не перадаецца трэцім асобам.
Адзін з адвакатаў платформы Максім Церашкоў назваў запуск чат-бота знакавай падзеяй для беларускай юрыдычнай практыкі. "Гэта цалкам канфідэнцыяльны і бясплатны рэсурс, які ў рэжыме рэальнага часу дае магчымасць атрымаць кваліфікаваную дапамогу, не выходзячы з дома, калі, вядома, не патрабуецца вывучэнне дакументаў у кабінеце ў адваката. Калі спатрэбіцца дадатковая кансультацыя, бот прадаставіць інфармацыю аб кантактах бліжэйшых даступных адвакатаў у рэгіёне, дзе патрабуецца дапамога", - сказаў ён.