8 декабря 2015
Народны ансамбль "Вяселле" Каўгарскага сельскага клуба адсвяткаваў 35-годдзе з дня ўтварэння
Народны ансамбль "Вяселле" Каўгарскага сельскага клуба ў суботу адсвяткаваў 35-годдзе з дня ўтварэння.
Каля яго вытокаў стаяла былы старшыня прафкама мясцовага саўгаса Марыя Міхадзюк, дзякуючы якой і адбылося першае выступленне самадзейных артыстаў — працаўнікоў "Каўгарскага". Крыху пазней эстафету кіраўніка творчай групы падхапіў Анатоль Цімашэнка, які і зараз натхняе калектыў на новыя поспехі.
З 1989 года ансамбль носіць званне народнага. У рэпертуары — старадаўнія беларускія карагодныя, вясельныя, жартоўныя песні, праграма "Запрашаем на вячоркі", абрады "Зажынкі", "Хрэсьбіны" і інш. Калектыў пастаянна ўдзельнічае ў раённых культурна-масавых мерапрыемствах, у тым ліку — штогадовым фестывалі “Веснавыя колеры”. Неаднаразова з канцэртамі артысты выязджалі ў Старыя Дарогі, Глуск, Бабруйск, Александрыю і інш. Паспяхова выступілі на III рэспубліканскім фестывалі фальклорнага мастацтва “Берагіня”. Яны — удзельнікі тэлевізійных праграм “Таленты Прыдняпроўя”, “Terra historica”, “Запрашаем на вячоркі”.
Павіншаваць “Вяселле” з днём нараджэння завіталі прадстаўнікі раённай і мясцовай улад, калектывы школы і бальніцы з Дараганава, калегі з Дрычына, аднавяскоўцы. У адрас віноўнікаў свята гучалі цёплыя словы, музычныя нумары. А яны, як і заўсёды, парадавалі прысутных песенна-танцавальнай творчасцю.