Праз узаемадзеянне — да вырашэння праблем

Планёрка, якая заўсёды праводзіцца ў райвыканкаме напачатку рабочага тыдня, на гэты раз завяршылася па-асабліваму: пасля абмеркавання надзённых пытанняў быў арганізаваны выезд па населеных пунктах пяці сельсаветаў Асіповіччыны. Такая паездка на чале са старшынёй райвыканкама Пятром Шукаловічам мела некалькі мэт: праверка выканання даручэнняў кіраўніка раёна, ацэнка работы органаў мясцовага кіравання і самакіравання па добраўпарадкаванні вёсак і аграгарадкоў, рэагаванне на звароты грамадзян.

Работу наладзілі такім чынам: старшыні сельсаветаў давалі кароткую характарыстыку мясцовасці і расказвалі, якімі праблемамі тут жывуць людзі, што зроблена і яшчэ трэба зрабіць, каб населеныя пункты станавіліся больш камфортнымі і зручнымі. Безумоўна, добраўпарадкаванне — справа шматгранная і складаецца з мноства крокаў. Дарэчы, яны павінны рабіцца ў тым ліку і самімі жыхарамі. Напрыклад, непрыемны асадак застаўся ад свіслацкай вуліцы з даволі прыгожымі калгаснымі домікамі: склалася ўражанне, што іх гаспадары спаборнічаюць у вырошчванні бур’яну на прысядзібных участках.

Агульная заўвага, якую атрымалі старшыні сельсаветаў і дарожнікі — несвоечасовае абкошванне шляхоў. Тут сухое надвор’е мела якраз станоўчы ўплыў: пустазелле пакуль не буяе, аднак “прычэсвання” абочыны адназначна патрабуюць. Не ўпрыгожвае хаатычная расліннасць і тэрыторыі гандлёвых кропак, сквераў.

У час наведвання населеных пунктаў звярталі ўвагу на розныя аспекты.

Так, напрыклад, пацікавіліся асартыментам і наяўнасцю тавараў вытворчасці нашага рэгіёна ў прамтаварным магазіне райспажыўтаварыства ў Татарцы. Звярталі ўвагу і на стан грамадскіх калодзежаў — гэта месца заўсёды павінна быць у належным парадку.

У кожным сельсавеце знайшоўся і станоўчы вопыт. Напрыклад, у тым жа Вяззі дабавілі некалькі кантэйнераў на пляцоўцы для збору смецця, што паспрыяла падтрыманню чысціні.

На тэрыторыі Ясенскага сельсавета ў вёсцы Асяродак праведзена значная работа па ўключэнні пустуючых участкаў у севазварот — калгасу ўжо перададзена 44 гектары.

Канструктыўная размова была працягнута ў райвыканкаме. У рашэнні ўзнікаючых праблем важна ўзаемадзеянне розных службаў паміж сабою і з насельніцтвам.

Было адзначана, што немалаважна ў гэтай рабоце сістэма, якасць і ўменне даводзіць распачатую справу да канца.

Па матэрыялах газеты "Асіповіцкі край"