16 октября 2015
Падарылі ўсмешку
У сераду сонейка свяціла асабліва ярка — мабыць, у гонар матуль, свята якіх адзначалася 14 кастрычніка.
Зразумела, кожны павіншаваў сваіх самых родных і любімых. А некаторым добрага настрою дадалі яшчэ і вучні 9-10 класаў СШ №4. Прадстаўнікі БРСМ і маладзёжнай арганізацыі выратавальнікаў-пажарных Уладзіслаў Корсак, Дар’я Молчан, Уладзіслаў Касько, Цімафей Куксар, Аляксандр Мацюшонак і Міхаіл Паланейчык разам са спецыялістам райкама саюза моладзі Анастасіяй Гоцінай выйшлі на вуліцы горада ў пошуках "віноўніц урачыстасці". Хлопцы і дзяўчаты ў форме БРСМ і БМГАВП віншавалі матуль з іх "прафесійным" святам, дарылі ім яркія чырвоныя шары, паштоўкі і кветачкі.
Зразумела, прахожыя звярталі ўвагу на такі святочны дэсант – па-добраму ўсміхаліся і хвалілі школьнікаў. Жанчыны з задавальненнем прымалі віншаванні, хоць і былі крыху здзіўленыя такой увагай моладзі, затое дзеці з радаснымі ўсмешкамі перахоплівалі ў матуль такія прыцягальныя паветраныя шарыкі. Маладыя актывісты падарылі добры настрой усім.