Пасяўная з новай тэхнікай
Сёлетняя вясна стала адметнай для ўсіх сельгаспрадпрыемстваў Асіповіччыны значным папаўненнем паркаў новай тэхнікай ад буйнейшага беларускага вытворцы — ААТ “Мінскі трактарны завод”. На сёння гаспадаркамі атрымана 28 адзінак з 33 запланаваных.
Энерганасычаныя трактары “Беларус-3022” з магутнасцю рухавікоў больш за 300 конскіх сіл ужо працуюць на палетках “Бярэзіны” і “Лапіч”, а днямі такі трактар паступіць і ў калгас імя Чарняхоўскага. Калгасы “Новы шлях”, “Чырвоны ўдарнік” і, зноў жа, імя Чарняхоўскага атрымалі “Беларусы-2022”. Не было раней у гаспадарках раёна сучасных гусенічных “Беларусаў-1502”, зборка якіх ажыццяўляецца на Мазырскім машынабудаўнічым заводзе. Цяпер жа гэтыя памочнікі, якія могуць выконваць сельскагаспадарчыя работы на пераўвільготненых глебах, ажыццяўляць ачыстку жывёлагадоўчых ферм і прылягаючых тэрыторый, трамбаваць зялёную масу пры закладцы сенажу і сіласу, з’явіліся ва ўзгаданых трох калгасах і ААТ “Асіповічыаграпрамтэхзабеспячэнне”.
Па дамоўленасці з пастаўшчыком тэхніка набыта на наступных умовах: чвэрць ад яе кошту сельгаспрадпрыемствы павінны будуць заплаціць пасля ўборачнай кампаніі — да 1 лістапада, 75% — на працягу трох гадоў роўнымі долямі за трактары 2011-2013 гадоў выпуску і за двухгадовы тэрмін — за тэхніку, сышоўшую з завадскога канвеера летась.
Агульны кошт паставак — каля 23 мільярдаў рублёў.