Суботнік

Падчас суботніка, які паўсюдна прайшоў 20 красавіка, жыхарамі Магілёўшчыны  зароблена  каля 6,5  мільярда  рублёў. Сродкі будуць накіраваны на падрыхтоўку да летняга  сезона  аздараўленчых лагераў і набыццё рэанімацыйных  аўтамабіляў для хуткай медыцынскай дапамогі.
Значны ўклад у агульную справу зроблены і нашым раёнам: удзел у ім прыняло каля 16 тысяч чалавек.
Аб’ектаў, абраных для добраўпарадкавання, было нямала. У горадзе — цэнтральны гарадскі парк і парк імя 50-годдзя Кастрычніка, Алея Герояў, могілкі па вуліцы Юбілейнай і інш. Актыўна ўдзельнічала ў суботніку кіраўніцтва рэгіёна на чале са старшынёй райвыканкама Пятром Шукаловічам. Дарэчы, якраз пасадка дрэў — справа сімвалічная: вынік сваёй працы можна будзе назіраць і праз дзясяткі гадоў...
Суботнік — не толькі магчымасць зарабіць сродкі для карысных патрэб, але і добры прыклад падрастаючаму пакаленню неабыякавых адносін да месца, дзе жывеш. Што гэта сапраўды так, пацвердзіў 4-класнік СШ № 1 Iлля  Галубцоў:  убачыўшы,  як  дарослыя  наводзяць  парадак  у  гарадскім парку, хлопчык сам папрасіў інструмент і з задавальненнем далучыўся да агульнай справы.