275 жыхароў Асіповіччыны прадстаўлены да ўзнагароджання медалямi "70 год вызвалення Рэспублікі Беларусь ад нямецка-фашысцкiх захопнiкаў".
Урачыстая цырымонія ўручэння юбілейных медалёў прайшла 24 чэрвеня ў культурна-спартыўным цэнтры "Асіповічы". З рук старшыні раённага Савета дэпутатаў Аляксандра Пузіка і ваеннага камісара Мікалая Гомана заслужаныя ўзнагароды атрымалі ветэраны Вялікай Айчыннай вайны, былыя вязні фашысцкіх канцлагераў, турмаў, гета і іншых месцаў прымусовага ўтрымання, створаных фашыстамі і іх саюзнікамі ў гады Другой сусветнай вайны.
Усе прысутныя ўшанавалі памяць загінуўшых на палях бітваў і вязняў фашызму хвілінай маўчання, а ў словах падзякі, якія гучалі ў адрас застаўшыхся ў жывых воінаў-вызваліцеляў і тых, чыё дзяцінства і юнацтва былі скалечаны вайной, чырвонай стужкай праходзіла думка пра тое, што толькі дзякуючы іх сіле, мужнасці і жыццястойкасці мы жывем на свабоднай зямлі, якая паўстала з разрухі працай і цярпеннем ваеннага пакалення. Падарункам для ўзнагароджаных сталі песні ваенных гадоў, якія гучалі па асабліваму пранікнёна і шчымліва ў выкананні хору ветэранаў. Песням свайго дзяцінства і юнацтва падпявала ўся зала...
На жаль, з-за змены месца жыхарства ці па стане здароўя не ўсе ветэраны і пасівелыя “дзеці вайны” змаглі прыйсці на ўрачыстае мерапрыемства, але юбілейныя медалі яны абавязкова атрымаюць да святочнай даты ці ўжо атрымалі. Многіх прадстаўнікі ваеннага камісарыята і дзяржаўных устаноў ужо наведалі дома, дзе правялі цырымонію ўзнагароджання і нізка пакланіліся ад усіх нас.
