І вось такія цуды

51 змешаная артылерыйская група аказвае дапамогу дзецям з асаблівасцямі ў развіцці, якія займаюцца ў цэнтры карэкцыйна-развіваючага навучання і рэабілітацыі. На добраахвотна сабраныя ваеннаслужачымі грошы былі набыты навагоднія падарункі, якія камандзір часці палкоўнік Дзмітрый Пестаў 24 снежня ўручыў падшэфным.

У дзіцячым сацыяльным прытулку ў Ясені перад святам пабывалі шматлікія госці. У чарговы раз завітаў да яго выхаванцаў і начальнік Асіповіцкага райаддзела Упраўлення Следчага камітэта краіны па Магілёўскай вобласці Аляксандр Друзік. Сустрэча хоць і была нядоўгай, але цёплай і радаснай. Хлопчыкі і дзяўчынкі атрымалі ў свой адрас шчырыя пажаданні шчасця, дабра, любові і ўдачы, а таксама салодкія падарункі.

У аддзяленні дзённага знаходжання інвалідаў прыраённым Цэнтры сацабслугоўвання насельніцтва навагодняя праграма распачалася з прадстаўлення “У гасцях у ёлачкі зялёнай”, падрыхтаванага самімі наведвальнікамі ўстановы, работнікамі райцэнтра культуры і навучэнцамі дзіцячай музычнай школы № 2. Ёлка, прыгожыя шары, мішура, увага гледачоў і іх дружныя апладысменты, падарункі стварылі па-сапраўднаму святочную атмасферу і падарылі выхаванцам аддзялення масу станоўчых эмоцый.

У якасці спонсараў выступілі ТАА “Белга-Прам”, хлебазавод, СТАА “Сіці голд груп”. Гуманітарную дапамогу таксама аказала беларускае грамадскае аб’яднанне “Хрысціянскае служэнне духоўнаму адраджэнню асуджаных”.

У раённым Цэнтры культуры традыцыйна ў рамках рэспубліканскай акцыі “Нашы дзеці” прайшла дабрачынная ёлка. Яна сабрала лепшых вучняў школ — пераможцаў розных конкурсаў і алімпіяд, дзяцей са шматдзетных і маламаёмных сямей, выхаванцаў апякунскіх і прыёмных сямей, дамоў сямейнага тыпу.

З прывітальным словам да іх звярнуўся намеснік старшыні райвыканкама Аляксандр Шаўлюга, а святочную праграму падрыхтаваў Цэнтр творчасці дзяцей і моладзі. Падчас яе можна было не толькі прыняць удзел у вясёлых гульнях, але і пазнаёміцца адзін з адным. Заўсёды ў цэнтры ўвагі былі Дзед Мароз са Снягуркай. Вакол панавалі добры настрой і дзіцячы смех. Напрыканцы хлопчыкі і дзяўчынкі атрымалі цудоўныя салодкія падарункі ад райвыканкама.

Да Асіповіцкай спецшколы-інтэрнат дарогу ведаюць не толькі многія мясцовыя арганізацыі, але і з іншых рэгіёнаў краіны. Яны — частыя госці ў дзяцей, якім асабліва патрэбны людская ўвага, цяпло і ласка. Не сталі выключэннем і навагоднія святы, якія з нецярпеннем чакалі выхаванцы. Школа была па-дамашняму прыбрана, ёлка зіхацела рознакаляровымі шарамі і прыгожымі гірляндамі. А пад ёй, як і ва ўсіх сем’ях — падарункі. Плюс, для дзяцей была арганізавана паездка ў сталіцу на навагодняе шоу, якое праходзіла ў “Мінск-Арэне”.