7 красавіка 2013 года касцёл Божай Міласэрнасці адзначыў важную падзею — кансэкрацыю ці пасвячэнне, пасля якога святыня ўжо цалкам і выключна прысвечана Богу.
Кансэкрацыю касцёла і алтара здзейсніў арцыбіскуп Мінска-Магілёўскі Тадэвуш Кандрусевіч.
Асіповічы немагчыма ўявіць без прыгожага, узнесенага ў неба шпілямі і ўвенчанага крыжамі касцёла Божай Міласэрнасці. Пабудаваны ён нядаўна. Але парафія ў горадзе існуе з пачатку ХХ стагоддзя. Тады была невялічкая капліца, у якой вернікі збіраліся на набажэнствы. Падчас Літургіі ў ёй было цесна, таму парафіяне пачалі збіраць сродкі на будаўніцтва касцёла. Справа гэтая зацягнулася надоўга. І толькі ў 1995 годзе ў горадзе была ўзведзена часовая капліца, а ў 1999 распачалося будаўніцтва прасторнага касцёла.
Праз 7 гадоў вернікі сабраліся тут на першую Святую Імшу. Да сённяшняга часу вяліся ўнутраныя работы, сцены касцёла асвячаліся малітвамі вернікаў, але храм не быў пасвечаны.
