Раённае свята "Шчадроўкі" адбылося ў аграгарадку Вяззе
15 января 2016
"Добры вечар, шчодры вечар! Добрым людзям на здароўе!" — такімі словамі, як правіла, пачынаюць гурты калядоўшчыкаў віншаванні пад вокнамі і ў хатах напярэдадні старога Новага года. Колькі цеплыні, павагі, любові закладзена ў гэтых простых беларускіх словах-пажаданнях!
I гаспадары з асаблівым пачуццём вітаюць важных гасцей: прыход у дом валачобнікаў нашы продкі лічылі добрай прыкметай, сімвалам шчодрага ўраджаю і сямейнага дабрабыту. У падзяку за аказаны давер людзі стараліся як мага лепш адарыць вясёлых, каларытных, пераапранутых у карнавальныя строі калядоўшчыкаў.
Ужо каторы год гэтую цудоўную традыцыю падтрымліваюць на Асіповіччыне, ладзячы раённае свята "Шчадроўкі". Сёлета яно завітала ў аграгарадок Вяззе, куды з’ехаліся народныя калектывы — "Дзівакі" з раённага Цэнтра культуры, "Сваякі" з Карытнага і "Вяселле" з Каўгароў. Самадзейныя артысты апошняга асабліва парадавалі вяззеўцаў — менавіта ім выпаў шанц прайсціся з песнямі пад гармонік і бубен, танцамі і жартамі па вясковых вуліцах і завітаць у хаты сялян з Казой і Механошам.
А каля мясцовай установы культуры развярнуліся сапраўдныя народныя гулянні: радавала вока выстава вырабаў дэкаратыўна-прыкладнога мастацтва, можна было паспытаць гарачую юшку, купіць сёе-тое ў гандлёвым павільёне,
паслухаць добрую песню ў выкананні самадзейных артыстаў, прыняць удзел у народных гульнях і патанчыць. Самыя ж актыўныя атрымалі і заахвочвальныя прызы.
Затым мясцовы народны калектыў "Вязанка" гасцінна запрасіў усіх у залу, дзе распачаўся абрад шчадравання. Гаспадар і Гаспадыня ўвішна гатавалі калядны стол і, запаліўшы свечку, чакалі раджаных, якія неўзабаве з’явіліся на парозе і прынеслі з сабой многа вясёлых жартаў і прыемных нечаканасцей, песень і танцаў. Быў у іх ліку і дзіцячы калектыў — хлопчыкі і дзяўчынкі з аграгарадка не адстаюць ад старэйшых сяброў і таксама далучаюцца да адраджэння звычаяў бабуль і дзядуль.
Па народнай традыцыі, не абышлося ў гэты вечар і без гадання: варажылі як дзеці, так і дарослыя. I, канечне, парадавалі сваім выканальніцкім майстэрствам "Дзівакі".
Дзейства, што адбывалася на сцэне, узрушыла пачуцці гледачоў, якія віталі самадзейных артыстаў апладысментамі і шчырымі ўсмешкамі. I дзякавалі за цудоўную магчымасць дакрануцца да вытокаў даўніны. Са станоўчымі эмоцыямі і добрым настроем вярталіся яны дадому, дзе іх чакала шчодрая вячэра і абавязкова куцця.
"Асіповіцкі край"
