Пасяўная, санітарыя грамадскага харчавання, энергазберажэнне. Менавіта гэтыя пытанні былі найбольш значнымі на парадку дня чарговага пасяджэння райвыканкама, якое адбылося 17 сакавіка.

Мерапрыемства прайшло на чале са старшынёй райвыканкама Пятром Шукаловічам і ў прысутнасці гендырэктара Магілёўскага дзяржаб’яднання “Мясамалпрам” Андрэя Ермаліцкага.

Падрыхтоўка да вясенняй сяўбы

На 2017 год перад вытворцамі  сельгаспрадукцыі пастаўлена задача пасеяць збожжа і зернебабовыя на плошчы не менш за 10292 гектары, рапсу — 1390 га.

Для дасягнення запланаваных аб’ёмаў прадукцыі жывёлагадоўлі патрэбна забяспечыць у цэлым 102543 т кармавых адзінак. Гэта дазволіць атрымаць на кожную ўмоўную галаву 62 ц кармавых адзінак, у тым ліку 32,4 на стойлавы перыяд.

Павышэнне якасці назапашваемых травяных кармоў патрабуе больш шырокага выкарыстання палімерных матэрыялаў. З дапамогай новых тэхналогій неабходна нарыхтаваць не меней 6600 тон. 

Каб атрымаць названыя вышэй аб’ёмы кармоў, гэтай вясной спатрэбіцца правесці комплекс мерапрыемстваў па паляпшэнні структуры травастояў, павелічэнні ўдзельнай вагі бабовых і бабова-злакавых травасумесяў. Дзеля гэтага неабходна правесці падсеў шматгадовых траў на плошчы не меней 2579 га, залужэнне і перазалужэнне 3490 га лугоў.

Таксама патрабуецца правесці  вапнаванне 5500 га, унесці на палеткі раёна 256 тыс. т угнаенняў, 2982 кг мікраўгнаенняў, набыць і своечасова ўнесці 51705 кг сродкаў абароны раслін.

Санітарны стан аб’ектаў грамадскага харчавання

За мінулы і першыя два месяцы бягучага года райЦГЭ было праверана 100% кантралюемых аб’ектаў гандлю, грамадскага харчавання, прыдарожнага сэрвісу, рынак асіповіцкага райста. Парушэнні санітарнага заканадаўства выяўлены на ўсіх  аб’ектах.  Сярод  іх: адсутнасць таварных ярлыкоў (44%), нездавальняючы санітарны стан (37,1%),  адсутнасць  вытворчага кантролю за выкананнем санітарных правілаў  (25,2%),  парушэнне тэмпературных рэжымаў рэалізацыі прадукцыі (16,4%), продаж пратэрмінаваных тавараў (5%) і г.д.

Па фактах выяўленых парушэнняў складзена 206 пастаноў аб прыцягненні  да адміністрацыйнай адказнасці. Спагнана штрафаў на агульную суму 56840 рублёў.

Найбольш сур’ёзныя прэтэнзіі з боку санслужбы прад’яўляюцца Асіповіцкаму райста, ААТ “Гандаль”, ПГВУП “СВ-Тэкстыль”, ГСУП “ЯкОЛДКомпані”,  ТАА “ЛібрэцікГруп”,  ААТ “Асіповіцкі камбінат грамадскага харчавання”, ПГУП “Декабрьский”. Ад кіраўнікоў гэтых арганізацый патрабуецца ў найкарацейшыя тэрміны навесці належны парадак.

Эканомія энергарэсурсаў

У цэлым мэтавы паказчык па энергазберажэнні летась склаў мінус 4,4% пры заданні мінус 2,8%.

У раёне было рэалізавана  67  энергазберагаючых мерапрыемстваў, дасягнуты рост спажывання мясцовых відаў паліва (110,5% да ўзроўню 2015 года). Аднак на працягу года не цалкам і не своечасова аплачвалі спажытую электраэнергію

сельгаспрадпрыемствы і АДУКВП “Водаканал”. З выкананнем устаноўленага паказчыка па энергазберажэнні не справіліся ААТ “Рыбгас “Свіслач”, “Каменічы”, “Лапічы”.

Сёлетні прагнозны паказчык энергазберажэння — мінус 3,3%, павелічэнне долі МВП да 39% і эканоміі  2300  т  паліва  патрабуе ад суб’ектаў гаспадарання эфектыўнай работы  па  рэалізацыі  ўсіх запланаваных мерапрыемстваў, накіраваных на павышэнне энергаэфектыўнасці Асіповіцкага раёна.

Газета "Асіповіцкі край"